وزارة الاتصالات وتكنولوجيا المعلومات بتجهز مفاجأة للمواطنين، والمفاجأة دي هتعمل ثورة في عالم الاتصالات والانترنت.. ياتري اية هيا المفاجأة دي.. واية التاثير اللي هتضيفه علي شبكات المحمول في مصر.. كل ده هنعرفه مع حضراتكم في التقرير  ده خليكم معانا للآخر

مصر حاليا بتعمل ثورة في كل قطاعات العمل المختلفة، والدور حاليا جه علي قطاع الاتصالات وتكنولوجيا المعلومات، والمركز القومي لتنظيم الاتصالات أعلن أن فروع شركات المحمول الأربعة في مصر  بدأ في استقبال العملاء لتفعيل شريحة  eSIM ودي أول شريحة رقمية في مصر على ارقام التليفونات .

الجهاز القومي لتنظيم الاتصالات، قال أنه بدأ النهاردة إطلاق تقنية الشريحة المدمجة eSIM في السوق المصري وده بعد ما مشغلي شبكات المحمول الأربعة فودافون وأورانج واتصالات ووي انتهوا من كل  الاختبارات الفنية لتشغيل الخدمة.

طيب ازاي الناس تقدر تفعيل الخدمة الجديدة للشريحة المدمجة eSIM علي تليفوناتهم ؟.

الجهاز المركزي لتنظيم الاتصالات حدد خطوات تشغيل الخدمة الجديدة علي تليفونات المواطنين في حالة لو هتشتري خط جديد من خلال شوية خطوات أولها أن العميل لازم يروح واحد من فروع الشركة صاحبة الخط اللي معاه في التليفون ويطلب شريحة مدمجة eSIM، وبعدها الموظف في الفرع هيعرض عليه شوية ارقام يختار منهم الرقم المفضل بالنسبة، وبعدها هيوقع علي عقود شراء الخط الجديد للشريحة المدمجة eSIM، وبعدها موظف خدمة العملاتء هيقوم بطباعة رمز الاستجابة السريعة QR code من النظام الداخلي.
بعد ما موظف خدمة العملاء يخلص الشغل الإداري له، هيسلم العميل الشريحة الجديدة، وهيبدأ يحطها في التليفون بتاعه ويفعلها.
نيجي بقي للناس اللي بتسال عن خطوات تفعيل الخدمة علي الارقام اللي معاهم ودي هتكون من خلال زيارة واحد من فروع الشركة اللي المواطن تابع ليها، وهيطلب شراء شريحة مدمجة eSIM، وبعدها موظف خدمة العملاء هيمضيه علي عقد الشريحة المدمجة eSIM الجديدة، وبعدها موظف خدمة العملاء هيبدل للعميل شريحة الـ SIM التقليدية بالشريحة الجيددة eSIM علي نفس الرقم، وبعدها الموظف هيطبع رمز الاستجابة السريعة QR code من النظام الداخلي، وهتبقي كده أنت فعلت الخدمة الجديدة علي تليفونك المحمول بدون ما تغير رقمك ولا اية حاجة.

طيب اسعار الخدمة الجديدة للشريحة المدمجة eSIM بتوصل لكام؟.
شركة فودافون قالت أن سعر شريحة eSIM للعملاء هتوصل 350جنيها وهتوصل رسوم انتقال العميل من الشبكة القديمة للشبكة الجديدة بنفس الرقم علي الشريحة 300 جنيه، وكمان شركة المصرية للاتصالات اعلنت هيا كمان عن اسعار الشريحة الجديدة وقالت أنها هتوصل لـ  330 جنيه في حالة لو الموطن عايز يشتري خط جديد وهتوصل تكلفة استبدال الشريحة القديمة لواحدة جديدة لـ  270 جنيها، أما شركة أورانج فاعلنت عن تحديد سعر 350جنيه لشراء الشريحة الجديدة، وهتوصل تكلفة تغيير العميل للشريحة القديمة بواحدة جديدة لـ 300 جنيه.

شركات الاتصالات اشترطت علي العملاء اللي عايزين يغيروا خطوطهم للشريحة الجديدة eSIM ، أن يكون معاهم بطاقة رقم قومي وتكون سارية أو جواز سفر حديث وشهادة إقامة سارية بالنسبة للأجانب .