ليه مصر بتسعى لتقليص زمن الإفراج الجمركي وعاوزة تخليه ساعات؟ وإزاي الاتفاقيات الجديدة مع الإمارات والبحرين هتأثر على التجارة ؟ وهل ده معناه إننا دخلنا في سباق تسهيل التجارة على المستوى الإقليمي؟.. فى الفيديو ده هنقولك ايه اللى بيحصل فى الكواليس وليه الاتفاقيات دي بتحصل وإيه الفايدة اللي هتعود على الاقتصاد المصري

لما نقول إن البضاعة اللي بتدخل أو بتخرج من الموانئ المصرية هتخلص إجراءاتها في ساعات بدل أيام ده معناه إن وقت الانتظار الطويل اللي كان بيكلف الشركات فلوس وتكاليف ضخمة هيقل جدًا وهنا بقى مربط الفرس..  مصر مش واقفة عند السعودية بس اللي مضت معاها اتفاقية لتقليص زمن الإفراج الجمركي..  لأ .. دي دلوقتي بتتحرك على الإمارات والبحرين

اللي بتعمله مصر دلوقتي هو جزء من حاجة اسمها برنامج المشغل الاقتصادي المعتمد باختصار ده عبارة عن اتفاقيات بتتم بين الدول علشان يعترفوا ببعض القوائم من الشركات اللي بتلتزم بقواعد معينة.. الشركات دي بتاخد مزايا جبارة أهمها الإفراج السريع عن بضايعها في الموانئ يعني لو كنت شركة معتمدة بضاعتك مش هتستنى كتير وكل الإجراءات الجمركية هتخلص بسرعة جدًا

الاتفاقيات دي اتعملت الأول مع السعودية وزمن الإفراج هناك نزل من 3 أيام لـ3 ساعات بس وده معناه حركة التجارة هتبقى أسرع والشركات هتوفر فلوس كتير جدًا كانت بتضيع على التخزين والانتظار

دلوقتي مصر بتوسع الاتفاقيات دي مع البحرين والإمارات والهدف إن البضائع اللي بتتنقل بين الدول دي تتخلص إجراءاتها الجمركية بسرعة خرافية

لو بصينا على حجم التجارة بين مصر والدولتين دول هنفهم السبب الإمارات مثلًا واحدة من أكبر 5 أسواق للصادرات المصرية بحصة بتعدي 6% من إجمالي صادرات مصر غير البترولية كمان حجم التبادل التجاري بين مصر والإمارات وصل لـ4 مليار دولار السنة اللي فاتت.. تخيل بقى لما نقلل زمن الإفراج الجمركي هتزيد الصادرات أكتر والتكلفة هتبقى أقل

أما البحرين فحجم التبادل التجاري مع مصر كان 379 مليون دولار خلال أول 9 شهور من السنة اللي فاتت.. ولما نضيف تسهيلات أكتر في التعاملات التجارية ده هيعزز حركة التبادل بين البلدين

الاتفاقيات دي ليها أهمية كبيرة منها تقليل التكلفة كل ما تقلل زمن الإفراج الجمركي بتقلل مصاريف التخزين وبالتالي ده بينعكس على الأسعار النهائية.. وكمان زيادة الصادرات لما العملية تبقى أسرع وأسهل الشركات تقدر تصدر أكتر وده بيعزز الاقتصاد تعزيز الشراكات الاتفاقيات دي بتقرب الدول أكتر في التعاملات التجارية وبتفتح فرص للشركات الكبيرة إنها تتوسع أكتر

الاتفاقيات دي جزء من خطة حكومية لتقليل زمن الإفراج الجمركي تدريجيًا الهدف الأساسي إننا نوصل لفترة يومين بس بحلول 2025 .. وده هيخلي مصر منافس قوي جدًا في المنطقة خصوصًا لما تيجي الدول والشركات تختار مين يكون مركزها التجاري

خلاصة الكلام.. مصر بتقول للعالم إنها جاهزة للتوسع وإنها مش بس بتتكلم عن خطط لكنها بتنفذ على أرض الواقع..و الاتفاقيات دي هي مفتاح لتسهيل التجارة الدولية وخطوة جديدة علشان نثبت إننا قادرين نحسن الاقتصاد ونوفر فرص أكبر للشركات المحلية والعالمية