الدهب كل ساعة في حال والسعر محدش عارف يوقفه وطالع بسرعة الصاروخ.. ياتري الدهب هيقفل السنة دي علي كام... واللي عايز يشتري يشتري دلوقتي ولا يتسني .. 
 
كل الناس دلوقتي مفيش في لسانها غير الدهب واسعار الدهب والاسعار اللي كل ساعة بترفع، وحاليا اللي معاه دهب مستني الاسعار ترفع أكثر من كده خصوصا أن الوقت اللي جاي واضح أنه وقت الدهب ومفيش اي استثمار تاني كسبان سواء كانت شهادات في البنوك أو عقارات .

طيب اية اللي بيحصل أسعار الدهب دلوقتي ؟.
من كان يوم فاتوا واسعار الدهب بعد كانت مستقرة نسبيا وكانت الزيادة والانخفاض معقولين وفي الحدود المعروفة من زمان سواء وهيا من 20 الي 50 جنية وكانت الزيادة لما بتوصل ل 100 كانت الناس مالها بتقول أسعار الذهب رفعت، خصوصا بعد القرارات الاقتصادية المهمة اللي قام بيها البنك المركزي في ضبط السوق الاقتصادي في مصر وانتهاء وجود سعرين للدولار في مصر وده حصل بعد توفير كميات كبيرة من النقد الأجنبي بالبنوك واللي كان بعدها القرار الاقتصادي بتحرير سعر صرف الجنية المصري قصاد الدولار بشكل مرتب والقرار ده كان الاداه السحرية لانتهاء وجود السوق المصري في بيع العملات الأجنبية في مصر.

بعد القرارات الاقتصادية دي سعر الصرف في مصر أصبح متحرر وكل التعاملات بقت بتم من خلال البنوك المصرية وما تعاملات وصرف العملات الأجنبية رجعت بشكل كامل للبنوك الوطنية بعد ما كانت أغلبها رايح للسوق السودا في التجارة بالعملات خصوصا تحويلات المصريين بالخارج واللي كلها بقت بتم داخل البنوك وفي الفترة اللي فاتت تحويلات المصريين بالخارج سحبت في البنوك رقم قياسي وصل ل20.8 مليار دولار في الفترة من يناير ولحد سبتمبر اللي فات بس .

طيب أسعار الذهب رايحة علي فين دلوقتي ؟.
الدهب في مصر مسجل ارقام قياسية وحاليا سعر الجرام عيار 21 واللي هو الأكثر انتشاراً ومبيعا في مصر وخصوصا في القري والمحافظات وصل 3810 جنية وده رقم قياسي الدهب موصلش له من قبل قرار الإصلاح الاقتصادي والخاصة بتحرير سعر صرف الدولار بشكل مرن واللي كانت في شهر مارس اللي فات .

من بداية الاسبوع اللي فات واسعار الدهب في مصر بترفع بأرقام كبيرة بسبب الارتفاع اللي بيحصل في سعر صرف الدولار مقابل الجنيه في البنوك الرسمية، واللي بدأ يتحرك في الأيام اللي فاتت بعد توقعات رئيس مجلس الوزراء واللي أكد فيها  أمكانية ارتفاع أو هبوط سعر الصرف في حدود 5% خلال الفنىة اللي جاية .

ارتفاع سعر الصرف كان له انعكاس مباشر علي تسعير الدهب في مصر واللي بيتم تسعيره علي أساس سعر الدولار، وده اللي ساعد أن اسعار الدهب في مصر  تسجل ارقام قياسية في الوقت الحالي، ده غير التوترات الجيوسياسية المتزايدة المحيطة اللي موجودة في منطقة الشرق الأوسط واللي لها تأثير مباشر على مصر .

المهندس سعيد إمبابي، الخبير في مجال تقارير وأبحاث أسواق الدهب، نصح المواطنين بسىرعة شراء الدهب في الوقت الحالي، وقال إن الشراء لازم يكون فترات مش فترة واحدة خصوصا أن أسعار الدهب حاليا ماحدش عارفها رايحة علي فين وممكن الفترة اللي جاية انزل أو تكمل ارتفاع، وتوقع أن أسعار الدهب توصل ل 4000 جنية من بداية السنة الجديدة.