يا ترى ايه اللي بيحصل في سوق صرف العملات الأجنبية؟ وليه الدولار بيواصل ارتفاعاته في الأيام الأخيرة؟ وهل السعر اللى وصلت ليه العملة الأمريكية يقلق ولا الأمور تحت السيطرة؟ والأهم ايه توقعات اسعار الدولار الأيام الجاية؟

في الأيام اللي فاتت سعر الدولار في مصر كسر كل الأرقام القياسية ووصل لـحدود 50.90 جنيه لأول مرة في التعاملات الأخيرة يعنى خلاص داخل على 51 جنيه .. وخد بالك سعر الدولار مش مجرد رقم بيتغير ده بيأثر علينا كلنا من أسعار السلع للمشاريع وحتى للسفر برا.

طب ليه الدولار بيزيد بالشكل ده؟ وهل الكلام ده معناه إن الأزمة خارجة عن السيطرة ولا هي خطوة في خطة أكبر؟

خليني أبسطلك الموضوع واشرحلك اللى بيحصل بالظبط .. الجنيه المصري بيتحرك قدام الدولار وفقًا لنظام "الصرف المرن" اللي الحكومة اعتمدته.. والكلام ده معناه ان سعر الدولار ما بقاش ثابت ومرتبط بتدخل الدولة لكن بيتحدد على حسب العرض والطلب في السوق .. يعنى كل ما الطلب زاد كل ما السعر ارتفع والعكس صحيح كل ما الطلب قل والمعروض زاد كل ما السعر تراجع وانخفض

وحاليًا فيه طلب كبير جدًا على الدولار في السوق المصري وده بسبب الاستيراد لأن مصر بتعتمد بشكل كبير على استيراد السلع الأساسية وده بيزود الطلب على الدولار.. كمان تراجع التدفقات الدولارية لأن مع الأزمات العالمية تدفقات الدولار من السياحة أو الاستثمارات الأجنبية لسه مش كافية لتغطية الطلب المتزايد.. وأخيرا السياسة النقدية العالمية.. الدولار بقى قوي قدام كل العملات بعد تأثيرات الانتخابات الأميركية والسياسات الاقتصادية هناك

السؤال المهم و اللي كلنا تقريبا بنسأله.. هل الارتفاع ده يخوف؟

الإجابة بتعتمد على زاويتين .. الأولى قصير المدى وفيها الارتفاع أكيد مأثر علينا كمواطنين خاصة في أسعار السلع والخدمات وكل ما الدولار يزيد الأسعار بتغلى أكتر.. والتاني طويل المدى والحكومة بتأكد إن ده جزء من خطة لإصلاح الاقتصاد وإن الأمور هتاخد وقت عشان تتظبط

و رئيس الوزراء مصطفى مدبولي صرح مؤخرًا وقال: "لا داعي للقلق من زيادات سعر الدولار.. الوضع هيستقر لاحقًا."

إزاي الوضع ده ممكن يتحسن؟

فيه أكتر من خطوة ممكن تساعد في تقليل الضغوط على الجنيه أهمها طبعا زيادة تدفقات الدولار من خلال تنشيط السياحة اللي بالفعل بتحقق أرقام كويسة.. وجذب استثمارات أجنبية والحكومة بدأت خطوات لجذب مستثمرين دوليين في قطاعات مختلفة.. وكمان التحكم في الاستيراد عن طريق تقليل استيراد السلع غير الأساسية لتخفيف الضغط على الدولار

ولازم نبقا عارفين ان الوضع في سوق العملات أكيد صعب ومش بسيط بس مهم نفهم إننا جزء من منظومة عالمية بتأثر وبتتأثر بالأحداث اللي حوالينا..و ارتفاع الدولار في مصر بيطرح سؤال مهم هل الإصلاحات الاقتصادية هتكون كافية لاحتواء الأزمة على المدى الطويل