لو معاك فلوس وعايز تدخرها أو تستثمرها، إيه هي أفضل طريقة تحقق لك مكسب، بنوك ولا عقارات ولا استثمار في مجال تأتي زي صناعة أو زراعة وغيرها، وإيه هو أفضل خيار اللي يضمن لك ربح لفلوسك بدون أي مجهود من حضرتك.. هنقولك على كل التفاصيل في التقرير ده. 
 

الشهادات البنكية 2025 بتعتبر من أفضل أنواع الاستثمار في الفترة دي، عشان كده بتتنافس البنوك في تقديم شهادات ادخار واستثمار بأعلى عائد، ويقدر أي عميل يحقق منها مكاسب يومية أو شهرية.

عشان كده، بنك مصر بيقدم شهادات ادخار متنوعة بالعملة المحلية، بدوريات صرف يومية أو شهرية أو ربع سنوية أو سنوية أو بنهاية المدة، وبعائد ثابت ومتغير.

وأول الشهادات المميزة من بنك مصر، هي شهادة طلعت حرب ومدتها سنة كاملة، ومتاح 3 عوائد حسب رغبة العميل في دورية الصرف، يعني 27% نهاية المدة، 23% سنويًا يصرف يوميًا، 23.5% يصرف شهريًا، وبتعتبر الشهادة دي هي الأعلى في مصر من بين البنوك المصرية.

ونقدر نقول إن الحد الأدنى لشراء الشهادة ألف جنيه بس، وممكن حضرتك تزود براحتك وحسب المبلغ اللي أنت عايز تحطه في الشهادة.

كمان، البنك بيتيح شهادة ابن مصر الثلاثية المتناقصة، ومدتها 3 سنين والحد الأدنى للشراء ألف جنيه، وكمان متاح 3 أنواع من الشهادة المتناقصة بدوريات صرف مختلفة بين شهري وربع سنوي وسنو.

فبالنسبة للشهادة الأولى ذات العائد الشهري، فبتكون الفائدة في السنة الأولى 26% والسنة الثانية 22.5% والسنة الثالثة 19%.

أما دورية الصرف الربع سنوي، بيكون العائد للسنة الأولى 27%، والسنة الثانية 23% والسنة الثالثة 19%، وودورية الصرف السنوي، بيكون العائد في السنة الأولى 30%، والسنة الثانية 25%، والسنة الثالثة 20%.

نيجي بقى لشهادة القمة، اللي مدتها 3 سنين، والحد الأدنى لشرائها ألف جنيه، أما العائد بتاعها فبيكون 21.5% سنويًا بس بيصرف شهريًا.

كمان، الشهادة الثلاثية المتغيرة، فمدتها 3 سنين، والعائد بتاعها 21.5% سنويًا بيصرف شهريًا، والحد الأدنى للشراء 500 جنيه، ومتوفر دورية صرف ربع سنويًا بعائد 27.5% وحد أدنى للشراء ألف جنيه.

أما شهادة الـ5 سنين، فالعائد بتاعها بيكون على دورية الصرف الشهرية 12.25%، والحد الأدنى للشراء 1200 جنيه، والعائد على دورية الصرف السنوي بيكون 12.5%، والحد الأدنى للشراء ألف جنيه.

وبخصوص شهادة الـ7 سنين، فالعائد منها بيكون 12.75%، وبتصرف كل شهر، يعني هتقدر توفر منها فلوس احتياجاتك الشهرية بكل سهولة.

ولو حضرتك ناوي تدخر فلوسك او تستثمرها في شهادات الادخار، فاختار الشهادة الأنسب لك وتوكل على الله.