في وقت الدول بتنهار فيه من حولينا مصر منورة وكل يوم بتعمل إنجاز عالمي جديد على أرضها ودا مجاش من فراغ لكن بتعب وعرق سنين وتحدي الزمن وقيادة فاهمة العالم رايح على فين.. ايه اللي حصل النهاردة وازاي مصر بقت عاصمة لصناعة حيوية في العالم.. خليكم مع حضراتكم للآخر وهنعرف التفاصيل في التقرير  ده.

 
زي حاجات كتير كانت عشوائية في مصر وكانت هتنتهي لكن الدولة رجعتها تاني وطورتها وخلتها حاجة فخر للبلد .. كلامنا عن مدينة صناعة الجلود في الروبيكي واللي بتعتبر مثال حي على التغيير اللي حصل في مصر من ورش بدائية وصناعة هتندثر لمصانع حديثة باحدث تكنولوجيا في العالم ومن ضيق وخنقة سور مجري العيون لبراح الصحرا والتوسع والورش والمدابغ الصغيرة بقت صروح صناعية ضخمة مجهزة بأحدث الأجهزة والماكينات والنتيجة انطلاقة عالمية في صناعة دبغ الجلود مش في مصر بس لكن في الشرق الأوسط وأفريقيا كمان زي اللي حصل بالظبط قي صناعة الأثاث واللي السيسي حوله لصناعة عالمية في مدينة الاثاث العملاقة بعد ما كانت ورش دمياط قربت تقفل بسبب عدم مواكبتها للتطور

النهاردة الدكتور مصطفى مدبولي، رئيس مجلس الوزراء كان في زيارة تفقدية لمدينة الجلود في الروبيكي وشهد مدبولي  الإعلان عن طرح المرحلة التالتة من مدينة الجلود وقال إن مصر  عندها 100 مصنع جاهز بمدينة الجلود وقال كمان ان فيه توجيهات رئاسية لإعادة إحياء هذه الصناعات المتقدمة وإعادتها مرة أخرى للنور، وتعود مصر مركز لصناعة الجلود  بالاستفادة للخبرات العالمية وأن تكون هذه خطوة أولى نحو التصدير.

بالارقام  المرحلة الأولى بالمدينة بتستوعب جميع المصانع الموجودة بمنطقة سور مجرى العيون والصناعات المكملة ليها عند نقلها إلى مدينة الجلود بالروبيكى ، وهى على مساحة 160 فدان وفيها  80 عنبر بمساحات مختلفة وجاهزة للتشغيل وصلت التكلفة الإجمالية للمرحلة الأولى للمدينة حوالي مليار جنيه ودا بعد ما قرر مجلس الوزراء إنهاء المرحلة الأولى من مدينة الجلود في يوليو 2016/ عشان تكون جاهزة لاستقبال كل المدابغ المقرر نقلها من منطقة مجرى العيون إلى الروبيكى وفعلا تم الانتهاء من جميع منشآت المرحلة الأولى وأعمال البنية الأساسية الداخلية والخارجية وإطلاق التيار الكهربائي وتوصيل المياه واتمام أعمال التشطيبات عشان يتم نقل وتسكين 1066 مدبغة وقد بدأت الخطوات التنفيذية لنقل 10 مدابغ مختلفة الأحجام من منطقة مجرى العيون إلى الروبيكى بمدينة بدر

ولسه مع لغة الأرقام ونروح لتفاصيل المرحلة التانية من مدينة الروبيكي واللي هتقام على مساحة 116 فدان تم طرحها بالفعل وتقديم العطاءات وفحصها وتحديد شركة يتم إسناد العمل لها في ديسمبر 2016، وتم تخصيص 200 مليون جنيه من صندوق الترفيق للبنية الأساسية وجارى اتخاذ الإجراءات التنفيذية وأما بخصوص المرحلة التالتة فهي مخصصة لجذب استثمارات خارجية في مجال الصناعات المغذية وصناعات القيمة المضافة زي صناعة الأحذية والمنتجات الجلدية المصنعة سواء الموجهة للتصدير، أو الاستخدام المحلى وكمان المرحلة التالتة بتيح إنشاء مقرات للشركات العالمية لزيادة فرص التصدير وفتح أسواق خارجية لمنتجاتنا الجلدية.