ايه مصير شهادات الادخار ذات العائد المرتفع 27% في البنوك مع اقتراب موعد استحقاقها في البنوك وهل البنوك هتلغيها ولا هتجددها وايه مصير الفلوس اللي الناس اشترت بيها الشهادات دي.. خليكم معانا للآخر وهتعرفوا التفاصيل في التقرير  ده.

 
عارفين طبعا أن في وقت من الأوقات بعض البنوك طرحت شهادات ادخار بفايدة عالية عشان تسحب السيولة من أصحاب المدخرات ومن الناس اللي معاها فلوس زيادة عشان تغري الناس تستثمر فلوسها في الشهادات دي وتخفف حدة المشتريات عشان تسيطر على ارتفاع معدلات التضخم في الأسواق ومن بين الشهادات دي كانت شهادة ادخار ذات العائد المرتفع 27% ..

وزي ما احنا عارفين إنه بداية من شهر يناير الجاي هيحل أجل أو موعد  استحقاق شهادات الادخار ذات العائد 27% لأنه تم إطلاق شهادات 27% في يناير 2024 والشهادة مدتها سنة وهيتم صرف العائد بتاعها في المدة دي ولو فاكرين بنكا الأهلي ومصر، وهما أكبر بنكين حكوميين في مصر طرحوا شهادة ال27% في يناير اللي فات وناس كتير اشترتها

وحسب مصادر مصرفية مطلعة في بنوك  الاهلي ومصر  الشهادة ذات العائد 27% مازالت مستمرة لغاية دلوقتى ولم يتم تعديلها او إيقافها وأضافت المصادر لبانكير ان العميل صاحب شهادات 27% هيصرف العائد الخاص بها نهاية المدة وهي 12 شهرا ويمكن تجديد الشهادة لو استمرت حال طلب العميل تجديدها ومثلا العائد على مليون جنيه هو 270 ألف جنيه كمان البنوك اللي طرحت الشهاده دي منحت العميل ميزة الاقتراض بضمانها بالإضافة إلى إمكانية إصدار بطاقات ائتمانية بضمانها، ويمكن استرداد الشهادة بعد مضي 6 أشهر، اعتباراً من يوم العمل التالي لتاريخ شراء الشهادة، وذلك وفقًا لقواعد الاسترداد والشروط والأحكام المنظمة.
يعني باختصار شديد لسه الشهادات دي مستمرة والعميل يقدر يجددها لو البنوك معدلتش سعر الفائدة أو وقفت الشهادات دي ولازم نكون عارفين إن النوع دا من الشهادات بيكون مكلف على البنوك بسبب ارتفاع سعر الفائدة .

طيب ممكن تحصل مفاجآت لاصحاب شهادات الادخار ذات العائد المرتفع في الفترة الجاية ؟

كل شي وارد لكن الموضوع مرهون بقرار لجنة السياسة النقدية في البنك المركزي المصري واللي هتعقد اخر اجتماع ليها في السنة 26 ديسمبر الحالي وهتقرر سعر الفايدة على الإيداع والاقتراض وقرارها بيكون مؤشر للبنوك لتحديد سعر الفايدة في الفترة الجاية وزي ما احنا عارفين إن اللجنة لتحدد القرار بناء على نسبة التضخم في الأسواق ولو النسبة كانت كبيرة احتمال يتجه المركزي لرفع الفايدة وهنا البنوك ممكن تطرح شهادات ادخار اعلي لكن يفضل التثبيت هو السيناريو الأقرب في اجتماع ديسمبر اللي جاي حسب توقعات فريق كبير من الاقتصاديين وهنا البنوك هتقرر مصير الشهادات ذات العائد المرتفع واللي احتمال كبير تبقي عليها.